Бизиң бундай деп жар салып отырғанымыздың мәниси бар. Кешебир танысымды ушыратып қалдым. Ол бираздан берли маған ойласықлы бир гәп пенен келип-кетип жүр. Анығырағы, «баламды оқыўға киргизиў ушын биреўлерге бир-еки сум пул берип қойған едим, қайтарып ала алмай жүрмен. Қашан барсамда, жақында доп.контрактқа буйрық шығады, сөйлесип қойыппан дейди. Сол рас гәп пе екен, өзи?..» деп тәшўишленип жүрген еди. Ол асығып кетип баратыр екен. Жол болсын сорадым. «Келипти»-деди ол жүреги шәўкилдеп…

Сол күни түстен кейин Қарақалпақ мәмлекетлик университетиниң быйылғы жылғы мәсләҳәт орайының жуўаплы хаткерине барып жолықтым.

-Бул гәпте жан бар. Бирақ доп.контрактқа емес, ал вакант орынларға оқыўшылар алып атырмыз. Дағазаны, студентлердиң дизимин киреберисте илдирип қойыппыз, қәлесеңиз барып көриўиңиз мүмкин,-деди жуўаплы хаткер.

Ҳақыйқатында да, бул гәплер дурыс екен. ҚМУ да бул мәселеде қыстаўлы ҳәм дурыс шешим қабыл етилипти. Кейин басқа жерлерде де болдым. Ол жерлерде де усындай жумыслар жүргизилип атыр.

Кешке қарап жаңағы танысым менен телефон арқалы байланыстым.

-Не қылдың, бала оқыйтуғын болып па?

-Жумыс жаңа басланып атыр дейди, алдын вакант орынларға алатуғын қусайды, доп.контрактың буйрығы соннан кейин шығады, күтиң деди.

-Күтесиз бе?

-Басқа не қыла аламан, топраққа отқояман ба? Қолымнан берип, аяғымнан тоздымғой, иним. Дым илажы болмаса өзиңе тинәў күнги айтқандай етип жазып беремен, қасында таярланған балалар оқып атыр, олардың неше сум бергенин, кимге бергенинде билемен. Бизиң бала қолына берилген «Х вариантты» пайдалана алмағанбыш. Айтпақшы, анаў күнги саған берген қағаз ше? Сол бизиң балаға берилгени… өзи ҳақыйқатында да «Х вариант» па екен, сорастырып көрдиң бе?

-Үйренип атырман.

-Соған беккем болагөр. Сол бала ақшамды алып «Х вариантты» биреўлерден сатып алған, сизиң мақалаңыздағы (ол бизиң усы сайтымыздағы «Және тест сынақлары туўралы…» атлы кеўил кеширмелеримизди нәзерде тутпақта-автор) тест центрге арза берген оқытыўшылар айтып отырған «Н.Н»лер болса да тәжүпленбеймен. Қәне, сәл күтип көрейик, ақыры не менен питер екен?..

Танысыма, бул гәплерден кейин, бирден анаў-мынаў дей алмадым. Бирақ мен быйыл доп.контракт болмайтуғынын анық билип қайтқан едим. Мейли, ол бәри бир мениң блогиме тез-тез кирип турады ғо, өзи-ақ оқып көрип, түсинип алар.

Нәбәда сизлерде усындай аўҳалға түсип, не қыларыңызды билмей жүрген болсаңыз бизиң
электрон почтамызға ( kkreporter@mail.ru ) хат жазың, қолдан келгенинше жәрдем бериўге ҳәрекет етемиз.


Aling'an jer: